O Concello de Arteixo informa á veciñanza de Meicende de que, a partir do vindeiro día 6 de xullo, darán comezo os traballos da segunda fase da renovación e substitución dos contadores por dispositivos dixitais de última xeración nesta zona.
Esta actuación enmarcada no PERTE da auga forma parte do plan municipal de modernización da rede de abastecemento, co obxectivo de mellorar a eficiencia do servizo e avanzar cara a un sistema máis sostible e tecnolóxico.
Traballos progresivos por zonas
As intervencións realizaranse de maneira progresiva por rúas e edificios, co fin de minimizar molestias á cidadanía. A empresa instaladora autorizada será MR AGUAS como subcontrata da adxudicataria UTE Telexestión Arteixo. O persoal técnico autorizado encargarase do cambio dos equipos, que poderá implicar breves cortes puntuais no subministro durante o proceso.
Recoméndase á veciñanza permitir o acceso aos operarios identificados cando sexa necesario para realizar a substitución no interior das vivendas ou comunidades.
Melloras co novo sistema
Os novos contadores dixitais permitirán:
- Lectura remota dos consumos, evitando accesos ao interior das vivendas.
- Maior precisión na facturación.
- Detección temperá de fugas ou incidencias.
- Mellor control e xestión do uso da auga.
Información á cidadanía
Desde o Concello indícase que non será necesario realizar ningún trámite previo por parte dos usuarios, e que calquera comunicación adicional realizarase con antelación suficiente.
Para resolver dúbidas ou solicitar información, os veciños poden poñerse en contacto cos servizos municipais ou coa empresa concesionaria do servizo de auga.
Con esta actuación, o municipio continúa avanzando na modernización das súas infraestruturas e na mellora da calidade do servizo prestado á veciñanza.
